Heb 9 | ASO | STEP | Ido' a'mine gamazi gomu' lo huko-ngidine' nene O'moso gubi' izi imi opo'ni laa' ido' inite' oloku' gizi imaa' nemu' nene lou' gamazi'vesi minivo minine' ve. Ido' a'mine lo huko-ngidine' gamazi nemu' nene misubouko mene mono' numuno ma minine' ve.

Hebrews 9

Me Misubouko Mono' Numuno Ado' Seli Numuno Gele Vine' Gizani' Nesi Ido' A'mingu' Gono Daa' Ani' Nesi Nene Okulumoku' Avazahalo' Iga' Ani' Nemu' Line'

1 Ido' a'mine gamazi gomu' lo huko-ngidine' nene O'moso gubi' izi imi opo'ni laa' ido' inite' oloku' gizi imaa' nemu' nene lou' gamazi'vesi minivo minine' ve. Ido' a'mine lo huko-ngidine' gamazi nemu' nene misubouko mene mono' numuno ma minine' ve. 2 Ee, seli numuno gele vine' mono' numuno nene mo gizi di otani' ve. A'mine mono' numungu' gana' lumu izi hukikangu' nene lamu livi' di badaa' ani' zavasi ido' O'moso lehizi-di velelo' mili-dani' beleti nesi ido' tevoli'vesi nene minaa' ine' ve. A'mine izi hukikani' lumu nene kekeize lo minine' numuno lulo ve laa' ani' ve. 3 Ido' oduvo numuno lulo gohi ma izi hukiki lavolavodunu' izi tilikani' nemu' nene mo kekeize atoli'mine lo minine' numuno lulo ve likevo minaa' ine' ve. 4 A'mine numuno lulou' nene unuvo lamine' oga' ine' inite' O'moso gizi imaa' ani' holomo ngolidunu' lili' ani' nesi ido' evene' gili dalizave lo lo huko-ngidine' gamazi milikani' bokisi ngolidunu' asabu' izi lili' ani' nesi ido' a'mingu' go'zikani' inite' nene Okulumokuti' ngimine' noso' nite' gulive mana minine' somo ngolidunu' lili' ani' nesi ido' Aloni' hatuso sisive ho'line' hatuso've nesi ido' O'moso'mo lo huko-ngidine' gamazi luhuvo gizine' geheni nesi nene minaa' ani' ve. 5 Ido' a'mine bokisi veleto' nene inite' sita' ma evene' godo'ine ne'mino mino holoke'ne'inesi minasine' inite' gulive kelubu avazahalo' lili' ani' inite' nene minaa' asine'. Kelubu ingine hela hela mini holoke'ne'ine di pateli di hozi li hiti nizasivo oluso' nene O'moso'mo evene' lihime'ine apase-ngedaa' ine' mo'mosi've nene minine'. Ido' minine' nenako a'mine kelubu minasido' nene O'moso'mi labanala nene soto' ogo minaa' ine' ve. Ido' a'mine inite' neti monovo nene ato ato' vai' neine' nenako a'minemu' imine' molo gohi ma lo-lengemelodo' nomive.

6 Ido' a'mine inite' nene di va'va' igi osu' likevo eveneto' medeli mini O'moso inite' lehizi-daa' ave ingine mono' gono'ine nene nidi a'mine mono' numungu' gana' izi hukikani' numuno lulou' nene gamene gamene dizaa' naha 7 a'midoti' numuno lulo gohi ma izi hukikangu' nene eveneto' medelo mino O'moso inite' lehize-daa' ive naba ne'movo' nene kilisimasilo' kilisimasilo' gamene hamokovo' dizaa' neive. Ido' dizeli gamene nene ei' lihime'vesi eveneliti lihime'inesi nene O'moso'mo apase-ledelingumu' ve lo ato ato' izeliti vanisesi nene damo dizo vaa' ine' nevoba ha do-dosavo' nene a'mingu' dizo vaa' ine' ve. 8 Ne'mine oga' ine' nenako neloti' nene ti' lo gelelesune: Gana' izi hukani' numuno lulo nene vo goloso amo hazavo' neivo ma numuno lulo gohi ma O'moso'mi kekeize atoli'mine lo minine' numuno lulo ve li izi hukikavo akalo' tile minine' lavolavo nesi nene ha mineline' nenako O'moso neida volone' akate nene olihe do soto' o-ledamive lo O'moso'mi Sikalahu' ne'mo lelebizavo gelelesune. 9 Ido' mono' numuno ado' seli numuno gele vine' nesi ido' a'mingu' igi mili di soto' ani' inite' nene idise gameneu' igi mili iga' nani' inite' neti avazaha'ine do soto' ogavo ne'mi monovo ti' lo noningune: A'mingu' nene inite' ma O'moso imi ido' sipisipi nevo'mine inite' ngibili lihimete apase-ledelive li oloku' gizi O'moso imi minaa' nani'za ne'mo ne'mine iga' aveti lu'ine nene ma do lisihe' lamine' o-ngedesa'mive. 10 Ido' lu'ine do lamine' o-ngedesa'mine' nene oko'inevo' do lamine' o-ngedeline' lou' gamazilokovo' nene e'meti minaa' ani' nenako ne'mo lu'ine nene do lisihe' lamine' o-ngedesa'mive. Ee, a'mine lou' gamazi nene noso' nite' ido' noso avoso nalizangumu' ido' ato ato' monovomu' nosou' ingi oko'ine noso izi hulilizangumu' ido' nevo'mine initekumukovo' nene gamazi li gizi Kilisito' monovo gosoho' do soto' ogo inite' muki' do lamine' ilidokovo' nene mino osu' loloseive li gizi nizani' ve.

11 Ido' Kilisito' nene eveneto' medelo mino O'moso inite' lehize-daa' ive naba mono' inite' lamine' idi'ne O'mosolati' soto' o'mo novine' nene do soto' ive lolo' ogo mo ogave. Aza nene mono' numuno ado' seli numuno gele vine' nene ivile' ogo lamine' goloso mino ido' ei' gono dalido' lisihe' gehepeve o minine' mono' numuno nene evenelitesi lili' amani' asi mo mene misuboukosi ma minamine' mono' numunomu' noluve. Aza a'mingu' nene dizo gono do 12 meme' ize ido' bulumaka' angale neti vanise nene a'mida do vamo ei' vanise've nene gamene hamokovo' mudise O'moso'mi mo'mosi've kekeize lo minida do vo minine' ve. Ido' ne'mine ine' ne'mo goloso ogo minunidoti' nene mudise do lu' izo O'mosola tine' molo vo minelone' akate vele-lidine' ve. 13 Ido' meme' ize ido' bulumaka' neti vanisemu' luvoni' nene monokumu' kekeize lani' inite' dikevosa monoku' dizilizani' akatine nene hize tile-lengedo okodida sihononi ne'mine inite' hiteline' nene gilite-lengedelive li meme' izeliti vanisesi ido' vemoho' bulumakaliti vanisesi ido' alungo bulumaka' gizi'votani' ne'mi lenehe've nesi nene O'moso imikevosa ne'mo okodida sihononi ne'mine hiteline' nene do hulavo lamine' oga' neine' nenako nemu' nene luvoni' ve. 14 Ido' neve nene inite' ngomoli'mo okodida sihononi ne'mine hitine' nene do lamine' oga' neine' nenako inite' naba Kilisito' vanise've ne'mo monovotine goloso labuluvo oga' akau' lengele'mize molaa' neine' neti lihime lutine gatingu' nene gilite hulo-lengedo minevo' minevo' O'moso gelekele' i-di gubi' izi imi minilizado' nene do lisihe' o-lengedelido' nene mo lisihe' gehepeve o neive. Ee, O'moso'mi minevo' minevo' Sikalahu've ne'mo Kilisito'ni hize ele' o-davo aza oko'nolo' lihime hamokisi minamine' mino oko'no've hulo O'moso imine' nenako ne'mo nene leli' lute do lamine' o-ledelido' lisihe' o neive.

15 Ido' Kilisito' vanise've ne'mo lihimete muki' gilite hulo-ledaa' neine' nenako Izesu' aza nene evenekisi O'mososi kuku holo-ledo gamazi hulo eza ema ogo leli' gele emelone' gamazi ve lo gosoho' gamazi O'moso'mo lo huko-lidine' nene do ogo limive lolo' ogo neive. Ido' ne'mine ine' nene O'moso'mo izipahala zuho minilizave lo elese molo-ledo lele'mize molave leli' nene minevo' minevo' inite' lemelove lo lo huko-ledo salani molo-lidine' inite' daloningumu' ve losa ne'mine ine' ve. Ee, O'moso'mo gomu' lo huko-lidine' gamazi nene avuto' ogo lihime duningumu' a'mido' golo hizo Izesu' hiline' ne'mo nene a'mine lihime nene apase-lidine' nenako ne'mo nene a'mine salani molo-lidine' inite' dalone' aka nene ngolo' lo neinako ha dalosune. 16 Ee, Izesu' nene ma helamidiniko O'moso'mo salani molo-lidine' initekisi ido' leli' dalizave lo lo huko-lidine' gamazisi nene gihile izelido' minamidine. Lingine mo gili nizave. Evene' malite alinge' hililizangumu' leli' monovolo' e'meti luhuvo ti' li gizi milaa' nave: Laza helekunivo ma mene alevete leli' initete nene dalizave li a'mine inite' dalizangumu' li huki-ngidani' gamazi nene luhuvou' gizi milaa' nave. Ido' a'mine inite'ine dalizangumu' luhuvo gizani' nene gizave hilikevo ne'movo' nene a'mine li huki-ngidani' gamazi nene gihile izelido' vo lisihe' iline' nenako nemu' nene luhuvo gizave hilami ve'inesi ha nizavo ma nene a'mine gamazi nene olihe gihile izamo ha minaa' neive. Nemu' nene ve mali'mo ne'mine luhuvo gize molosa mino helavo ma inite've dalizave ingine a'mine luhuvo gizive nene mo helanako luhuvo gizido' e'meto inite've ma nene ha dalosune lilisave. Lilisaha helave lilizani' gamazi nene mo lamineto' lahe ido' soza lahe nemu' nene gomu' ningi gilikevosavo' nene a'mine dalizave line' inite' nene ha dalisave. Helaa' ne'mo li hukaa' nani' gamazi nene do amuzo molaa' neive. Nemu' nene Izesu' aza helamidini O'moso'mo salani molo-lidine' initekisi' ido' leli' dalizave lo lo huko-lidine' gamazisi nene gihile izelido' minamidine. 18 Ido' helaa' ne'mo li hukaa' nani' gamazi nene do amuzo molaa' neine' nenako nemu' a'mine'mine ogo O'moso'mo gomu' lo huko-ngidine' gamazi nene haza do amuzo molani' nevoba helaa' ne'movo' nene do amuzo molani' ve. Do amuzo molani' nene bulumaka' ngibili hilikevo neti vanise'ine ne'mo a'mine gomu' lo huko-ngidine' gamazi nene do amuzo molani' ve. 19 Ee, a'mine lou' gamazi mininguti' gamazi godolo godolola nene Mose' lo soto' ogo evene' lo-ngemavosa ingine nene bulumaka' ma ngibilikevo Mose' aza vanise'ine do nososi do gopo ogo unuvo oga' ine' za ngomo ma gulive hisopu ve lo minine' ne'mi a'nava ma do a'mido' nene sipisipi zopovo gulehedunu' nene likosa vaniseu' nene lupizoo a'mine lou' gamazi'mi luhuvolokisi ido' a'mida evene' mukitokisi nene hibi' izo nohulo-ngedo 20 gamazi ti' lo line': Vanise mene O'moso'mo lou' gamazi gili dalizave lo lo huko-lingidine' nene do amuzo molaa' neine' vanise ma neive. Ido' Mose' ne'mine ine' nenako nemu' O'moso'mo gomu' lo huko-ngidine' gamazi nene vanisedunu' di amuzo mili-dani' ve luvoni' nene mo lamineto' luvoni' ve. 21 Ido' Mose' aza luhuvosi evenekisi vanise hibi' izo hulo-ngidine' ne'mino mono' numuno ado' seli numuno gele vine' nesi ido' O'moso opo'ni li gubi' izi imaa' angu' nene lapese gomise mite' inite' muki' a'mingu' milikevo minido' nesi vanise hibi' izo huline' ve. 22 Ido' gomu' lo huko line' lou' gamazi neu' nene naza luvoni' evenekisi ido' luvoni' initekisivo' nevoba inite' muki' gidini ne'mine ma goloso ilizahe lihime dalizahe ilizani' nene initeliti vanisedunu' nene do lamine' olosane lo lo hukine' ma neive. Ido' a'mine gomu' lo huko line' gamazi neu' nene ize nevo'mine gana' ma bili vanise'inedunu' nene hibi' izi O'moso'mi holomo'velo' hulamani' nene lihime nene mo keke' apase-ngedesa'mine' ve.

Kilisito' Nene Oko'no Hulo Vanise've Lepo O'moso Noemo Hiline' Ne'mo Lihimete Apase-lidine' Nemu' Line'

23 Ee, gomu' lou' gamazi ne'mo ne'mine ilizave lo lo neine' nenako nemu' a'mine seli mono' numuno nesi a'mingu' inite' muki' nesi nene Okulumoku' minine' avazahalo' lili' ani' inite' nene luvodi'mine igi bulumaka' ngibili O'moso imi vanisedunu' nene hibi' izi-ngidi di kekeize lilisave. Ne'mine ilisaaha misubouko mene avazaha inite' do lamine' o-ngedelive li bulumaka' ngibili vanise'ine hibi' izi hulaa' nani' nene Okulumoku' inite' do lamine' o-ngedelido' lisihe' o mineline' inite' ne'mo ngivile' ogo lamine' goloso mineleseive. 24 Ido' nene nanitekumu' luvoni' neve. Kilisito' aza mono' numungu' dizine' nene evenelite lili' igi di kekeize lani' mono' numuno ado' Okulumokuko minine' ne'mi avazahalo' minine' mono' numungu' nene dizine' nevoba asi mo Okulumoku' gehepeve nene dizo leli' hize ele' o-ledelesa O'moso'mi velelo' vo neive. 25 Ido' dizine' nene Zuda veti eveneto' medelo mino O'moso inite' lehize-daa' ive naba aza ei' vanise've do dizamo ize ato atoliti vanise'ine nene O'moso'mi kekeize atoli'mine lo minine' numuno lulo'veu' nene kilisimasilo' kilisimasilo' do dizo O'moso lehize-deka' lehize-deka' oga' ine' ne'mine nene ei' Kilisito' ilido' o minidiniko O'moso'mo misubo do soto' idoti' api' ogo gamene muki' oko'no hulo'mo ogo mulumo geleka' geleka' ogovo' minidine'za a'mine Zuda veti eveneto' medelo mino O'moso inite' lehize-daa' ive naba'mo oga' ine' ne'mine ilido' minamine' nenako nemu' aza gamene muki' eze oko'no hulo vanise've lepo O'moso lehize-deka' lehize-deka' ogo minelesa dizine' nevoba asi O'moso'mo molani' gamene nene osu' lolosa neivo Kilisito' aza gamene hamokovo' ei' oko'no nene hulo vanise've lepo O'moso lehize-do lihimete nene mudise hulo-ledelesa soto' ine' ve. 27 Ido' O'moso'mo lido' ogo evene' laza gamene hamokovo' helosa O'moso'mo goni' o-ledelido' volosunako 28 Kilisito' aza a'mine'mine ogo evene' mukiliti lihime geho oko'no've hulo hiline' nenako alinge' gohi aline' nene lihimetemu' amo eikumu' gizebo nonive nene mudise do lu' izo lele'mize lamine' olosa aloseive.